ရခိုင်အမျိုးသားပါတီ (ANP) ၏
ပြည်ထောင်စုငြိမ်းချမ်းရေး (၂၁)ရာစုပင်လုံ ညီလာခံသို့ တင်သွင်းသည့်
အကြံပြုစာတမ်း

နိဒါန်း

ပြည်ထောင်စုမြန်မာနိုင်ငံ၏ ပြဋ္ဌာန်းထားသောနယ်နမိတ်ထဲတွင် ရခိုင်၊ ဗမာ၊ မွန် တို့သည် ထီးပြိုင် နန်းပြိုင် ပဒေသရာဇ်နိုင်ငံများအဖြစ် သမိုင်းတွင် ထင်ရှား ရှိခဲ့ကြသည်။

၁၇၈၄-ခုနှစ်တွင် ဗမာပဒေသရာဇ်ဘုရင်၏ ကျူးကျော်သိမ်းပိုက်မှုကို ခံခဲ့ရပြီး၊ အချုပ်အခြာအာဏာ နှင့် ခေတ်မီအမျိူးသားနိုင်ငံတော် တည်ဆောက်ရေး အခွင့်အလမ်းတို့ကို ရခိုင်တို့ လက်လွတ်ဆုံးရှုံး ခဲ့ သည်။

၁၈၂၄-ခုနှစ် အင်္ဂလိပ်-မြန််မာပထမ စစ်ပွဲအပြီးတွင် ရခိုင်ပြည်မှာ ဗြိတိသျှနယ်ချဲ့ လက်အောက်သို့ ကျရောက်သွားခဲ့ပြန်ပါသည်။
ဗြိသျှကိုလိုနီဘဝမှလွတ်မြောက်ရန် ဗမာအပါအဝင်တိုင်းရင်းသားအားလုံးက လက်တွဲ၍ လွတ်လပ်ရေး တိုက်ပွဲဆင်နွှဲခဲ့ကြသဖြင့် ၁၉၄၈-ခုနှစ် ဇွန်နဝါရီလ (၄)ရက် နေ့တွင် မြန်မာနိုင်ငံ လွတ်လပ်ရေး ရရှိခဲ့ပါသည်။

တိုင်းရင်းသားများက လွတ်လပ်သောမြန်မာနိုင်ငံတွင် တန်းတူရည်တူရှိသော၊ လွတ်လပ်၍ တရားမျှတမှုကို အခြေခံသည့် ကိုယ်ပိုင်ပြဋ္ဌာန်းခွင့် အပြည့်အဝရှိသော ပြည်ထောင်စုကို တည်ဆောက် နိုင်မည် ဟု မျှော်လင့်ခဲ့ကြသော်လည်း တစ်ပြည်ထောင်စနစ်ကို ကျင့်သုံးသည့် အမည်ခံ ပြည်ထောင်စု နိုင်ငံသာ ဖြစ်ပေါ်လာခဲ့သည်။

တိုင်းရင်းသားများအနေဖြင့် နိုင်ငံရေးအရဆုံးရှုံးမှုများကို ပြန်လည်ရရှိရန်အတွက် ဒီမိုကရေစီ ဘောင် အတွင်းမှ တရားဝင်ပါတီ ဖွဲ့စည်း၍သော်လည်းကောင်း၊ လက်နက်ကိုင်လမ်းစဉ် ဖြင့် သော်လည်းကောင်း တိုက်ပွဲဝင်ခဲ့ကြသည်မှာ ယနေ့ကာလအထိပင် ဖြစ်သည်။

၂၀၀၈-ဖွဲ့စည်းအုပ်ချုပ်ပုံအခြေခံဥပဒေတွင် ပျော့ကွက်၊ဟာကွက် များစွာရှိသော်လည်း စစ်အာဏာရှင်စနစ် ပျောက်ကွယ်ပြီး၊ ဒီမိုကရေစီလမ်းစပေါ်နိုင်ရေး အတွက် ရခိုင်အမျိုးသားပါတီသည် ၂၀၁၀ ရွေးကောက်ပွဲကို ဖြတ်သန်း၍ လွှတ်တော်အဆင့်ဆင့်တွင် ပါဝင်ခဲ့သည်။

လက်ရှိနိုင်ငံရေးအခြေအနေသည် စစ်မှန်သော ဖက်ဒရယ်ပြည်ထောင်စု ပေါ်ပေါက် စေရေး အတွက် ရခိုင်အမျိုးသားပါတီအပါအဝင် တိုင်းရင်းသား နိုင်ငံရေးပါတီများ၊ လက်နက်ကိုင်အဖွဲ့အစည်းများ အားလုံးက ၀ိုင်းဝန်းကြိုးပမ်းရန် ဆန္ဒ တညီတညွတ်တည်း ရှိနေကြသော အချိန်ကာလ ဖြစ်သည်။

ယခု ကျင်းပနေသည့် ပြည်ထောင်စုငြိမ်းချမ်းရေးညီလာခံ (၂၁-ရာစု ပင်လုံ) သည် ပြည်တွင်းစစ် ချုပ်ငြိမ်းရေးနှင့် ကျွန်ုပ်တို့ ယုံကြည်မျှော်လင့်သော ဖက်ဒရယ် ပြည်ထောင်စု ပေါ်ထွန်းရေးအတွက် အခြေခံအုတ်မြစ်ကို ချပေးနိုင်ရမည်။ သို့မှသာ ငြိမ်းချမ်းသော တိုင်းရင်းသားပေါင်းစုံ တန်းတူ ချစ်ကြည်သော ပြည်ထောင်စု ပေါ်ထွန်းလာမည် ဟု ရခိုင်အမျိုးသားပါတီက လေးလေးနက်နက် ယုံကြည်သည်။

တန်းတူအခွင့်အရေးရှိကြသော အမျိုးသားပြည်နယ်များ၏ ကြည်ဖြူသော သဘော တူညီချက်ဖြင့် ပေါင်းစပ်မှုရှိနေသရွေ့သာလျှင် စစ်မှန်သောဖက်ဒရယ် ပြည်ထောင်စု တည်ရှိနေနိုင်မည် ဟု ကျွန်ုပ်တို့ ယုံကြည်သည်။

ရည်ရွယ်ချက်

၁။ စစ်မှန်သောဖက်ဒရယ်ပြည်ထောင်စု တည်ဆောက်ရန် (ဆိုလိုသည်မှာ ရခိုင် လူမျိုးတို့၏ ကိုယ်ပိုင်ပြဋ္ဌာန်းခွင့်၊ ကိုယ့်ကံကြမ္မာကိုယ် ဖန်တီးပိုင်ခွင့် နှင့် မြန်မာ(ဗမာ) အပါအဝင် တိုင်းရင်းသားလူမျိုးများအားလုံး တန်းတူရည်တူ အခွင့်အရေးကို အာမခံ သည့်၊ လူမျိုးကို အခြေခံသော ပြည်နယ်များဖြင့် ဖွဲ့စည်းထားသည့် စစ်မှန်သော ဖက်ဒရယ်ပြည်ထောင်စုကို တည်ဆောက်ရန်)၊

၂။ ရခိုင်လူမျိုးတို့ နှင့် ရခိုင်မျိုးနွယ်စု တိုင်းရင်းသားတို့၏ အကျိုးစီးပွား ဖွံ့ဖြိုး တိုးတက် လာစေရေး နှင့် အဆိုပါ အကျိုးစီးပွားများအား ကာကွယ်စောင့်ရှောက်ရန်။

၃။ ဒီမိုကရေစီစနစ် ထွန်းကားရေး ကြိုးပမ်းဆောင်ရွက်ရန်။

နိုင်ငံရေးကဏ္ဍ

၁။ နိုင်ငံတော်ကို ပြည်ထောင်စုအဖွဲ့ဝင် ပြည်နယ်များဖြင့်ဖွဲ့စည်းသည့် ဖက်ဒရယ် ပြည်ထောင်စု စနစ်ဖြင့် တည်ဆောက်ရမည်။

၂။ ဗမာပြည်နယ်အပါအဝင် ပြည်ထောင်စုအဖွဲ့ဝင်ပြည်နယ်များအား လူမျိုးကို အခြေခံ၍ လည်းကောင်း၊ လူမျိုးများကို အခြေခံ၍လည်းကောင်းဖွဲ့စည်းရမည်။

၃။ တိုင်းရင်းသားများအားလုံးတန်းတူရေးနှင့် အမျိုးသားကိုယ်ပိုင်ပြဋ္ဌာန်းပိုင်ခွင့် အပြည့်အဝပါရှိသော ဖက်ဒရယ်ဖွဲ့စည်းပုံ အခြေခံဥပဒေကို ရေးဆွဲရမည်။

၄။ စစ်မှန်သော ဖက်ဒရယ်ပြည်ထောင်စု၏ အနှစ်သာရနှင့်အညီ ဗဟိုအစိုးရနှင့် ပြည်နယ်အစိုးရ တို့အကြား အာဏာခွဲဝေ ကျင့်သုံးရမည်။

၅။ ထိုကဲ့သို့ အာဏာခွဲဝေကျင့်သုံးရာတွင် – ဗဟိုအစိုးရက ကိုယ်စားပြုကျင့်သုံးခွင့်ရ သော ဖက်ဒရယ်ပြည်ထောင်စုတစ်ခုလုံး၏ အချုပ်အချာအာဏာသည် ပြည်နယ်များ ထံမှ ဆင်းသက် စီးဆင်းခြင်းဖြစ်သည် တည်းဟူသော အခြေခံမူ နှင့် ဖက်ဒရယ် ပြည်ထောင်စု လည်ပတ်ဖြစ်တည် စေနိုင်ရန်အတွက် ပြည်နယ်များက ဗဟိုအစိုးရသို့ ခွဲဝေအပ်နှင်းပေးသော အာဏာများမှလွဲ၍ ကျန်သော ကြွင်းကျန်အာဏာများ အားလုံးသည် ပြည်နယ်များ၌ တည်သည် တည်းဟူသော အခြေခံမူ နှစ်ရပ်တို့အရ အာဏာခွဲဝေ ကျင့်သုံးခြင်းဖြစ်ရမည်။

၆။ ရခိုင်အပါအဝင် ရခိုင်မျိုးနွယ်စုများအားလုံးနှင့် ရခိုင်ပြည်နယ်အတွင်းရှိ အခြား တိုင်းရင်းသားများ အားလုံး၏အကျိုးစီးပွား ဖြစ်ထွန်းတိုးတက်လာရေးနှင့် အဆိုပါ အကျိုးစီးပွားအား ကာကွယ် စောင့်ရှောက်ရန်လိုအပ်သည်။

လုံခြုံရေးကဏ္ဍ

၁။ ပြည်နယ်များအလိုက် ပြည်နယ်အမျိုးသားတပ်မတော်များအား ပြည်နယ်များက ဖွဲ့စည်းခွင့် ရှိရ မည်။

၂။ ပြည်နယ်များအလိုက် ဖွဲ့စည်းသော ပြည်နယ်အမျိုးသားတပ်မတော်သည် သက်ဆိုင်ရာပြည်နယ်၏ စီမံကွပ်ကွဲမှုအောက်တွင် ရှိသည်။

၃။ ဖက်ဒရယ်ပြည်ထောင်စုတပ်မတော်ကို ပြည်နယ်အမျိုးသားတပ်မတော်များအား အခြေခံ၍ ဖွဲ့စည်း ရမည်။ ပြည်နယ်အမျိုးသားတပ်မတော်များမှ အချိုးကျစေလွှတ် သော တပ်များဖြင့် ဖွဲ့စည်းရမည်။

၄။ ဖက်ဒရယ်ပြည်ထောင်စုတပ်မတော် ဗဟိုစစ်ဦးစီးအဖွဲ့ကို ကာကွယ်ရေးဝန်ကြီးဌာန၏ လက်အောက်တွင် ဖွဲ့စည်းပြီး ပြည်နယ်အသီးသီးမှ စေလွှတ်သော စစ်ဦးစီးမှူးများက ပါဝင်ခွင့်ရှိရ မည်။ ဖက်ဒရယ်ပြည်ထောင်စုတပ်မတော်ကို ဖက်ဒရယ်ပြည်ထောင်စုနိုင်ငံတော်အကြီးအကဲ (သမ္မတ) ၏လက်အောက်တွင် ထားရှိရမည်။

၅။ ရဲတပ်ဖွဲ့များသည် ပြည်နယ်အစိုးရအဖွဲ့များ၏ ကွပ်ကဲမှုအောက်တွင် ရှိရမည်။

၆။ ရခိုင်ပြည်နယ်၏ထူးခြားသောအခြေအနေများအရ ရခိုင်ပြည်နယ် နယ်စပ်ဒေသ လုံခြုံရေးအတွက် ကမ်းခြေစောင့်တပ်(အမြဲတမ်းတပ်)၊ နယ်ခြားစောင့်တပ် (အမြဲတမ်းတပ်) နှင့် ပြည်သူ့စစ်(အရံတပ်) များအား ပြည်နယ်အစိုးရ လက်အောက် ရှိ ပြည်နယ်အမျိုးသားတပ်မတော်က ဖွဲ့စည်းခွင့်ရှိရမည်။

ဖက်ဒရယ်ပြည်ထောင်စု လွှတ်တော်/အစိုးရကဏ္ဍ

၁။ ဖက်ဒရယ်လွှတ်တော် နှင့် ပြည်သူ့လွှတ်တော် ဟူ၍ လွှတ်တော်နှစ်ရပ် ထားရှိ ရမည်။

၂။ ဖက်ဒရယ်လွှတ်တော်ကို ပြည်နယ်များမှ လွှတ်တော်ကိုယ်စားလှယ် အချိုးတူ တင်မြှောက် ဖွဲ့စည်း ပြီး ပြည်သူ့လွှတ်တော်ကို မြို့နယ်များကို အခြေခံသော လွှတ်တော်ကိုယ်စားလှယ်များဖြင့် ဖွဲ့စည်း ရမည်။ လွှတ်တော်နှစ်ရပ်သည် တန်းတူ ရည်တူ သီးခြားလွှတ်တော်များဖြစ်ရမည်။ လွှတ်တော်နှစ်ရပ် ကို ပူးတွဲ၍ ကျင်းပခွင့် မရှိစေရ။

၃။ ဖက်ဒရယ်အစိုးရအဖွဲ့၏ အကြီးအကဲ(ဝန်ကြီးချုပ်)အား ပြည်သူ့လွှတ်တော်မှ ရွေးချယ်တင်မြှောက် ရမည်။ ဖက်ဒရယ်အစိုးရအဖွဲ့တွင် ပါဝင်ရမည့် အစိုးရအဖွဲ့ဝင်များ ကို လွှတ်တော်နှစ်ရပ် မှ ရွေးချယ်ခံ ကိုယ်စားလှယ်များထဲမှ ပြည်နယ်အလိုက် အချိုးတူ ရွေးချယ် ထည့်သွင်းရမည်။

၄။ ဖက်ဒရယ်ပြည်ထောင်စု နိုင်ငံတော်၏ အကြီးအကဲ (သမ္မတ)ကို ရွေးချယ်ရာတွင် လူမျိုးကို အခြေခံ ၍ အလှည့်ကျစနစ်ဖြင့် ရွေးချယ်ရမည်။

၅။ ဖက်ဒရယ်ပြည်ထောင်စု နိုင်ငံတော်၏ အကြီးအကဲ (သမ္မတ)၏ လက်အောက် တွင် ဖက်ဒရယ် ပြည်ထောင်စုတပ်မတော်ကို ထားရှိသည့် အပြင် ၊ သမ္မတသည် နိုင်ငံခြား ဆက်ဆံရေုးကို ကြီးမှူးရ မည်။ ဖက်ဒရယ်ပြည်ထောင်စုရံပုံငွေကို ခွဲဝေ သုံးစွဲရေး အတွက် လွှတ်တော်နှစ်ရပ်နှင့်အတူ တွဲဖက် ကြီးကြပ်သူ ဖြစ်ရမည်။

ပြည်နယ်လွှတ်တော်/အစိုးရကဏ္ဍ

၁။ ဖက်ဒရယ်ပြည်ထောင်စုအဖွဲ့ဝင် ပြည်နယ်များသည် ကိုယ်ပိုင်ပြဋ္ဌာန်းခွင့် အပြည့်အဝရှိသော ပြည်နယ်ဖွဲ့စည်းပုံအခြေခံဥပဒေအသီးသီးကို ရေးဆွဲရမည်။

၂။ ပြည်နယ်လွှတ်တော်အား မြို့နယ်ကို အခြေခံသော လွှတ်တော်ကိုယ်စားလှယ် များဖြင့် ဖွဲ့စည်း ရမည်။

၃။ ပြည်နယ်ဝန်ကြီးချုပ်အား ပြည်နယ်ဖွဲ့စည်းပုံအခြေခံဥပဒေနှင့်အညီ ပြည်နယ်လွှတ်တော်မှ တိုက်ရိုက်ရွေးချယ်တင်မြှောက်ရမည်။

၄။ ပြည်နယ်ဝန်ကြီးချုပ်သည် ပြည်နယ်အစိုးရအဖွဲ့ကို ဦးဆောင်ဖွဲ့စည်းရမည်။

လူမှုရေးကဏ္ဍ

၁။ ရခိုင်လူမျိုး နှင့် ရခိုင်မျိုးနွယ်စုများ၏ သမိုင်း၊ စာပေ၊ ယဉ်ကျေးမှုအမွေအနှစ်များ၊ ကိုးကွယ်ရာ ဘာသာ၊ ဘာသာစကား၊ ရိုးရာဓလေ့ထုံးတမ်း အမွေအနှစ်များကို ရှာဖွေဖော်ထုတ် ထိန်းသိမ်း စောင့်ရှောက်ရေးတို့အတွက် လုပ်ပိုင်ခွင့်များ ပြဋ္ဌာန်း ရမည်။

၂။ လူမှုဖွံ့ဖြိုးရေး အခြေခံလိုအပ်ချက်များကို ဖြည့်တင်းဆောင်ရွက်ရမည်။

၃။ ပညာရေး၊ ကျန်းမာရေး၊ လူမှုရေး၊စီးပွားရေး အခွင့်အလမ်းများ တိုးတက်မြင့်မား ကောင်းမွန်ရန် ဆောင်ရွက်သွားရမည်။

၄။ အမျိုးသမီးများ၊ ကလေးသူငယ်များ၊ သက်ကြီးရွယ်အိုများ၊ မသန်စွမ်းသူများ၏ အခွင့်အရေးနှင့် ရပိုင်ခွင့်များကို ကာကွယ်စောင့်ရှောက်ရမည်။

စီးပွားရေးကဏ္ဍ

၁။ ပြည်နယ်များအတွင်းရှိ ပြည်တွင်းပြည်ပ ရင်နှီးမြှုပ်နှံမှုများ၊ စီမံကိန်းများကို ပြည်နယ်အစိုးရများက တိုက်ရိုက် စီမံခန့်ခွဲပိုင်ခွင့် ရှိရမည်။

၂။ ပြည်နယ်များအတွင်းရှိ ပြည်တွင်းပြည်ပ ရင်နှီးမြှုပ်နှံမှုများ၊ စီမံကိန်းများမှ ရရှိလာသော အကျိုး အမြတ်၊ အခွန်အကောက်များပေါ်တွင် ပြည်နယ်များက အပြည့်အဝစီမံခန့်ခွဲပိုင်ခွင့် နှင့် ရယူခံစား ပိုင်ခွင့် ရှိရမည်။

၃။ ပြည်တွင်းနှင့် နိုင်ငံတကာမှ ရင်းနှီးမြှုပ်နှံမှုများကြောင့် ပေါ်ပေါက်လာမည့် စီမံကိန်းများတွင် ဒေသခံ လူမျိုးလုပ်ငန်းရှင်များ ပါဝင်ရင်းနှီး လုပ်ပိုင်ခွင့် ရရှိစေရမည်။

၄။ လယ်ယာမြေ၊ သစ်တော၊ ရေချို ကမ်းနီး ကမ်းဝေး ရေလုပ်ငန်းများ စသည့် သဘာဝ အရင်းအမြစ်ထုတ်ယူသုံးစွဲသည့် ကဏ္ဍများသည် ဒေသဖွံ့ဖြိုးရေးအတွက် အရေးပါခြင်းကြောင့် ပြည်နယ်အစိုးရက စီမံခန့်ခွဲပိုင်ခွင့် အပြည့်အဝရှိစေရေမည်။

၅။ အခွန်အခကောက်ယူခြင်းအား ပင်မအားဖြင့် စီမံခန့်ခွဲဲသူများမှာ ပြည်နယ်အစိုးရများဖြစ်ပြီး ပြည်နယ်ဘဏ္ဍာငွေသို့ ထိုအခွန်အခများ စီးဝင်စေရမည်။ ဖက်ဒရယ်ပြည်ထောင်စုအစိုးရ (ဗဟိုအစိုးရ) သို့ ခွဲခြားသတ်မှတ်ပေးသော အခွန်အချို့မှလွဲ၍ ကျန်သော အခွန်ကောက်ခံပိုင်ခွင့် အားလုံးသည် ပြည်နယ်အစိုးရများ၏ ကောက်ခံ ရယူပိုင်ခွင့် ဖြစ်စေရမည်။

သယံဇာတခွဲဝေသုံးစွဲမှုကဏ္ဍ

၁။ သဘာဝသယံဇာတများအားလုံးကို ထိုသဘာဝသယံဇာတများတည်ရှိရာ သက်ဆိုင်ရာ အမျိုးသား ပြည်နယ်များက ပိုင်ဆိုင်သည်။ သက်ဆိုင်ရာအမျိုးသား ပြည်နယ်များက စီမံထိန်းချုပ်ကွပ်ကဲခွင့် ရှိ သည်။

၂။ သက်ဆိုင်ရာ အမျိုးသားပြည်နယ်သည် မိမိ၏ သဘာဝသယံဇာတများအား ထုတ်ယူသုံးစွဲပိုင်ခွင့်၊ ထိန်းချုပ်စီမံပိုင်ခွင့် ရှိသည့်အပြင်၊ သယံဇာတဝင်ငွေများကို ကိုင်တွယ်ပြီး ဖက်ဒရယ်အစိုးရသို့ ခွဲဝေပေးခြင်းကို သက်ဆိုင်ရာအမျိုးသားပြည်နယ်က ကိုင်တွယ် လုပ်ဆောင်ရမည်။

၃။ သဘာဝသယံဇာတ ပိုင်ဆိုင်ခွင့်၊ ထိန်းချုပ်စီမံခွင့်၊ အကျိုးခံစားခွင့်ရယူခွင့် တို့နှင့် ပတ်သက်၍ အမျိုးသားပြည်နယ်ကကိုင်တွယ်ရမည့် စာရင်း နှင့် ဖက်ဒရယ်အစိုးရက ကိုင်တွယ်ရမည့် စာရင်းဟူ၍ ခွဲခြားခြင်းမပြုရ။ သဘာဝသယံဇာတများအားလုံးကို သက်ဆိုင်ရာ အမျိုးသားပြည်နယ်များက စီမံခန့်ခွဲ ပြီး၊ သဘောတူသတ်မှတ်ကြသည့် အချိုးကျ ရသင့်ငွေကို သက်ဆိုင်ရာအမျိုးသားပြည်နယ် ဘဏ္ဍာငွေ စာရင်းထဲသို့ ထည့် ဝင်စေပြီး၊ သတ်မှတ်အချိုးကျခွဲဝေပေးငွေကို ဖက်ဒရယ် ပြည်ထောင်စု ဘဏ္ဍာငွေသို့ ထည့်ဝင်စေရမည်။

၄။ ဖက်ဒရယ်ပြည်ထောင်စု ဘဏ္ဍာငွေသို့ ထည့်ဝင်ရမည့် သတ်မှတ် အချိုးကျခွဲဝေ ပေးငွေမှာ သက်ဆိုင်ရာ အမျိုးသားပြည်နယ်လွှတ်တော်၏ သဘောတူညီချက်ကိုရရှိမှသာ ဖက်ဒရယ် ပြည်ထောင်စု ဘဏ္ဍာငွေသို့ ထည့်ဝင်စေရမည်။

နိဂုံး

အတိတ်က သမိုင်းဖြစ်ရပ်များကို သင်ခန်းစာယူ၍ ငြိမ်းချမ်းသာယာဝဖြိုးသည့် ပါတီစုံ ဒီမိုကရေစီ ဖက်ဒရယ်ပြည်ထောင်စုကို တည်ဆောက်ကြရမည်မှာ ကျွန်ုပ်တို့၏တာဝန်သာ ဖြစ်ပါသည်။ သမိုင်းကြောင်းအရ မတူကွဲပြားသော လူမျိုးပေါင်းစုံနေထိုင်လျက်ရှိခြင်းကြောင့် မိမိတို့ ပြည်ထောင်စုကြီး အဓွန့်ရှည်ရေးအတွက် ဘက်ပေါင်းစုံကို လေ့လာဆန်းစစ်ကာ အားလုံးနှင့် သဟဇာတဖြစ်နိုင်သော မူဘောင်များဖြင့် ဖက်ဒရယ်ပြည်ထောင်စုကို တည်ဆောက်ကြပါစို့ ဟု တိုက်တွန်းလျက် နိဂုံးချုပ်အပ် ပါသည်။

*****************************