လူ့အခွင့်အရေးကို တရားဝင်ဖောက်ဖျက်ခွင့် ရနေစေသော ဥပဒေ
ခေါင်းစဉ်ပါအတိုင်း စစ်ဖက်အာဏာပိုင်တွေအနေနဲ့ လူ့အခွင့်အရေးကို တရားဝင်ဖောက်ဖျက်ခွင့် ရနေစေတဲ့ တည်ဆဲ ဥပဒေတစ်ရပ်ရပ်ကို ပြောပါဆိုရင် “၁၉၅၆ ခုနှစ်၊ ပြည်ထောင်စုမြန်မာနိုင်ငံကာကွယ်ရေး (စစ်ဆင်မှုအထူးစီမံချက်)အက်ဥပဒေ” ဖြစ်ပါတယ်။
အထူးသဖြင့် ဒီဥပဒေရဲ့ ပုဒ်မ-၆ က အလွန်အမင်းဆိုးရွားတာကိုတွေ့ရတယ်။ ဒီပုဒ်မရဲ့ ဆိုရွားမှုကို အခါပေါင်းများစွာ တွေ့ကြုံခဲ့ကြရပြီး ဖြစ်ပါတယ်။
ပုဒ်မ-၆ အရ စစ်ဆင်ရေးတစ်ခုခုမှာ ပါနေတဲ့ စစ်အရာရှိတစ်ဦးဦးဟာ သင်္ကာမကင်းဖြစ်သူတစ်ဦးဦးကို အထက်သို့ မတင်ပြနိုင်မီ (၇)ရက် နဲ့ အခွင့်အာဏာပေးနိုင်တဲ့ အထက်စစ်အရာရှိက ခွင့်ပြုရင် သုံးလအထိ ချုပ်နှောင်ထားနိုင်ခွင့် ပေးထားတယ်။
ဒီလူတစ်ယောက်ကို ဘာလို့ ရုံးမတင်ကမ်းမတက်ဘဲ (၂၄) နာရီထက် ကျော်လွန်ဖမ်းထားတာလဲလို့ (လွှတ်တော်ကိုယ်စားလှယ် တစ်ဦးအနေနဲ့) ကျွန်တော်တို့ကမေးရင် ဒီပုဒ်မကို သူတို့ လက်ညိုှးထိုးကြကြလေ့ရှိပါတယ်။
ဒီလိုမျိုး လူ့အခွင့်အရေးကို ဖောက်ဖျက်ပြီး ချုပ်နှောင်ထားစဉ်ကာလတွေမှာ သေဆုံးသွားခဲ့ရသူတွေ မနည်းတော့ပါဘူး။ ဒီပုဒ်မကြောင့် မြန်မာနိုင်ငံဟာ လူတွေနေတဲ့ လူ့တိုင်းပြည်နဲ့ လုံးလုံး မတူတော့ပါဘူး။
NLD အစိုးရအနေနဲ့ ပြင်ရန်မဖြစ်နိုင်တဲ့ ဖွဲ့စည်းပုံပုဒ်မတွေကို ပြင်မယ်လေး ဘာလေးနဲ့ ကျားဖမ်းမယ် ဆင်ဖမ်းမယ် လုပ်နေမယ့်အစား ပြင်ဆင်ရန်ဖြစ်နိုင်တဲ့ ဒီလိုမျိုး ဆိုးရွားဥပဒေတွေကို ပြင်ဆင်ဖို့ လုပ်သင့်တယ်။
လက်ရှိ NLD ရဲ့အင်အားနဲ့ ဒီဥပဒေကို ပြင်ဆင်လို့ ရနိုင်မရနိုင်က မေးနေစရာမလိုပါဘူး။ political will နဲ့ ပြင်ချင်စိတ် ရှိမရှိကိုသာ မေးခွန်းထုတ်ရမှာ ဖြစ်ပါတယ်။
ကျော်ဇောဦး
၂၀၁၉ အောက်တိုဘာလ (၂၀) ရက်
==========
၁၉၅၆ ခုနှစ်၊ ပြည်ထောင်စုမြန်မာနိုင်ငံကာကွယ်ရေး (စစ်ဆင်မှုအထူးစီမံချက်)အက်ဥပဒေ
“၆။ ဖမ်းဆီးချုပ်နှောင်ပိုင်ခွင့်အာဏာ
(၁) စစ်ဘက်ဆိုင်ရာအရာရှိတစ်ဦးဦးသည် စစ်ဆင်မှုဆင်နွှဲရာတွင် အသုံးပြုသော တပ်ဖွဲ့တစ်ခု၌ ပါဝင် လျှင် သို့တည်းမဟုတ် ထိုတပ်ဖွဲ့နှင့် အတူပူးပေါင်းဆောင်ရွက်လျှင်၊ စစ်ဘက်ဆိုင်ရာ အရာထမ်း၊ အမှု ထမ်းများ၊ စစ်ဘက်ဆိုင်ရာပစ္စည်းများ သို့တည်းမဟုတ် စစ်ဘက်ဆိုင်ရာအသုံးအဆောင်များ ဘေးကင်း လုံခြုံမှုကို အန္တရာယ် ဖြစ်စေသော သို့တည်းမဟုတ် အန္တရာယ်ဖြစ်အောင် ကူညီအားပေးသော ပြုမှု တစ်ခုခုကို ပြုပြီး၊ပြုဆဲ၊ သို့တည်းမဟုတ် ပြုလတံ့ဟု သင်္ကာမကင်းသူ တစ်ဦးဦးကို ဖမ်းဆီးနိုင်သည်။
(၂) မည်သည့်အရာရှိမဆို ပုဒ်မခွဲ (၁)အရ တစ်ဦးတစ်ယောက်သောသူကို ဖမ်းဆီးလျှင် ထိုသို့ဖမ်းဆီး ကြောင်းကို အခွင့်ရ စစ်ဘက်ဆိုင်ရာ အာဏာပိုင်အား ချက်ခြင်းအစီရင်ခံရမည်။ ထိုသို့အခွင့်ရ စစ်ဘက် အာဏာပိုင်ထံမှ အမိန့်မရမီ ထိုအရာရှိသည် အခွင့်အရ စစ်ဘက်ဆိုင်ရာအာဏာပိုင်က သာမန် သို့တည်း မဟုတ် အထူးအမိန့်ဖြင့် သီးခြားသတ်မှတ်သည့် နေရာတွင် ထိုသို့ ဖမ်းဆီးထားသူကို အမိန့်စာဖြင့် အချုပ်ချထားနိုင်သည်။
(က) မည်သူကိုမျှ အခွင့်ရစစ်ဘက်ဆိုင်ရာအာဏာပိုင်ထံမှ အမိန့်မရဘဲ ဤပုဒ်မခွဲအရ (၇)ရက်ထက်ပို၍ အချုပ်ချ မထားရ။
(ခ) မည်သူကိုမျှ ဤပုဒ်မခွဲအရ (၃)လထက်ပို၍ အချုပ်ချမထားရ။
(၃) ဤပုဒ်မခွဲ (၂) ပါ ပြဋ္ဌာန်းချက်များအရ တင်သွင်းသည့် အစီရင်ခံစာကို ရရှိသောအခါ အခွင့်ရ စစ်ဘက်ဆိုင်ရာ အာဏာပိုင်သည် ဤပုဒ်မအရ ဖမ်းဆီးထားသူကို ခေတ္တအချုပ်ချထားရန် ပုဒ်မခွဲ (၂) ၏ ဒုတိယခြွင်းချက်ကို ထောက်ထား၍ အကြောင်းအားလျော်စွာ သင့်သည် သို့တည်းမဟုတ် လိုအပ်သည် ထင်မြင်သည့်အတိုင်း အမိန့်ချမှတ်နိုင်သည့်ပြင် ထိုသို့ ထင်မြင်သည့်အတိုင်း ထိုသူကို ချုပ်နှောင်ထားရန် သို့တည်းမဟုတ် လွှတ်ရန် အပြီးသတ်အမိန့်ကိုလည်း ချမှတ်နိုင်သည်။
(၄) နိုင်ငံတော်သမ္မတသည် တစ်ဦးတစ်ယောက်သောသူအား စစ်ဆင်မှု တစ်ခုခုထမြောက်အောင်မြင် ရေးအတွက်အားထုတ်မှု၊ ဆောင်ရွက်မှုတို့ကို ထိခိုက်အောင် တစ်နည်းနည်းဖြင့် ပြုမူခြင်းမှ တားဆီး စိမ့်သောငှာ ထိုသူနှင့်ပတ်သက်၍ အမိန့်ထုတ်ပြန်ရန် လိုအပ်သည်ဟု ယုံကြည်ကျေနပ်လျင်-
(က) ထိုသူကို နိုင်ငံတော်သမ္မတက အခါအားလျော်စွာ သတ်မှတ်သည့်နေရာတွင် ချုပ်နှောင်ထားရန် အမိန့်ချမှတ်နိုင်သည်။
(ခ) ထိုသူကို ပြည်ထောင်စုမြန်မာနိုင်ငံတွင် အမိန့်၌ သီးခြားဖော်ပြထားသည့်နေရာ သို့တည်းမဟုတ် နယ်အတွင်းနေထိုင်စေရန် သို့တည်းမဟုတ် ရှိနေစေရန် ထို့ပြင် ထိုနေရာ သို့တည်းမဟုတ် ထိုနယ် အတွင်းထိုသူရှိနေပြီး မဟုတ်လျှင် ထိုနေရာ သို့တည်းမဟုတ် ထိုနယ်သို့ အမိန့်တွင် သတ်မှတ်ထား သည့်အချိန်အတွင်း သွားရောက်စေရန် အမိန့်ချမှတ်နိုင်သည်။
(၅) မည်သူမဆို ပုဒ်မခွဲ (၄)၊ အပိုဒ် (၄)၊ အပိုဒ် (ခ) အရ ချမှတ်သည့် အမိန့်တစ်ခုခုကိုဆန့်ကျင်လျှင် ထိုသူကို (၆)လအထိ ထောင်ဒဏ်တစ်မျိုးမျိုးဖြစ်စေ၊ ငွေဒဏ်ဖြစ်စေ၊ ဒဏ်နှစ်ရပ်စလုံးဖြစ်စေ ချမှတ်ရမည်။”
ဥပဒေ အပြည့်အစုံကိုဖတ်ရန် လင့် =>
==========
Kyaw Zaw Oo's Blog 